Reinhard Heydrich

Dr Reinhard Tristan Eugen Heydrich (* 7. Merz 1904 z Halle (Saale); † 4. Juni 1942 z Prag) isch e dütsche SS-Oobergrubbefüerer und General vo dr Bolizei gsi. Wääred dr Zit vom Nazionaalsozialismus isch er Läiter vom Riichssicherhäitshauptamt (RSHA) und dr Stellverdräter vom Riichsbrotektor z Bööme und Määre gsi.^[1] In deene Posizioone isch er verantwortlig für e Hufe Chriegsverbräche und Verbräche gege d Menschlikäit gsi. 1941 het er vom Hermann Göring dr Ufdraag überchoo, d „Ändlöösig vo dr Juudefroog“ duurezfüere und isch äine vo dr Hauptorganisatoore vom Holocaust gsi. In dere Funkzioon het er am 20. Januar 1942 z Berlin die Wannseekomferänz gläitet, wo d Vernichdig vo de Juude, wo im dütsche Machtberiich gläbt häi, koordiniert worde isch.

Dr Heydrich isch am 27. Mai 1942 z Prag bim ene Aaschlaag dur tschechoslowakischi Widerstandskämpfer schwer verletzt worde und acht Daag spööter gstorbe. S NS-Reschiim het sich gräächt mit de Massaker vo Lidice und vo Ležáky.

1. ↑ Ian Kershaw: Hitler. 1936–1945. Deutsche Verlags-Anstalt, Stuttgart 2000, ISBN 3-421-05132-1, S. 640; es häisst dört «in (nit: von) Böhmen und Mähren»; lueg au Institut für Zeitgeschichte (IfZ): Bestand Heydrich, Reinhard und Lina (Memento vom 19. Septämber 2011 im Internet Archive) (PDF; 57 kB), in: IfZ-Archiv, Signatur ED 450, dort S. 2 (abgrüeft am 26. Mai 2019).